hamara ishq hai tafriq in-o-an se buland

hamārā ishq hai tafrīq īñ-o-āñ se buland

zamīñ-nashīñ haiñ magar haiñ ham āsmāñ se buland

bahār ḳhāk-ba-damāñ hai pastiyoñ meñ abhī

chaman agarche umīdoñ kā hai ḳhizāñ se buland

hayāt-e-qatra hai dariyā ke saath vābasta

vo uḌ gayā jo huā mauja-e-ravāñ se buland

ḳhirām-gāh-e-nigārāñ agar nahīñ na sahī

magar maiñ dil ko samajhtā huuñ kahkashāñ se buland

mazāq-e-ishq nahīñ pā-e-band-e-dair-o-haram

hamārā maslak-e-dīñ hai har āstāñ se buland

'salām' hañstī huī bijliyoñ kā toḌ ye hai

ki āshiyāñ meñ raho fikr-e-āshiyāñ se buland

hamara ishq hai tafriq in-o-an se buland

zamin-nashin hain magar hain hum aasman se buland

bahaar KHak-ba-daman hai pastiyon mein abhi

chaman agarche umidon ka hai KHizan se buland

hayat-e-qatra hai dariya ke sath wabasta

wo uD gaya jo hua mauja-e-rawan se buland

KHiram-gah-e-nigaran agar nahin na sahi

magar main dil ko samajhta hun kahkashan se buland

mazaq-e-ishq nahin pa-e-band-e-dair-o-haram

hamara maslak-e-din hai har aastan se buland

'salam' hansti hui bijliyon ka toD ye hai

ki aashiyan mein raho fikr-e-ashiyan se buland