hamara masala hal ho raha hai

hamārā mas.ala hal ho rahā hai

ki ab ye shahr jañgal ho rahā hai

kisī ne apnī naav kyā utārī

ye dariyā jaise pāgal ho rahā hai

musalsal ruuh zaḳhmī ho rahī hai

badan mismār pal pal ho rahā hai

maiñ shiddat dhuup kī jab sah chukā huuñ

koī aise hī bādal ho rahā hai

in āñkhoñ kī adam-e-dilchaspiyoñ se

hamārā ḳhvāb bojhal ho rahā hai

mirī sāñsoñ kā jaane kyā banegā

tirā aanā mo.attal ho rahā hai

jahāñ ke āḳhirī hisse meñ huuñ ab

safar-nāma mukammal ho rahā hai

hamara masala hal ho raha hai

ki ab ye shahr jangal ho raha hai

kisi ne apni naw kya utari

ye dariya jaise pagal ho raha hai

musalsal ruh zaKHmi ho rahi hai

badan mismar pal pal ho raha hai

main shiddat dhup ki jab sah chuka hun

koi aise hi baadal ho raha hai

in aankhon ki adam-e-dilchaspiyon se

hamara KHwab bojhal ho raha hai

meri sanson ka jaane kya banega

tera aana moattal ho raha hai

jahan ke aaKHiri hisse mein hun ab

safar-nama mukammal ho raha hai