hamare aage raqib-e-siyah-ru kya hai

hamāre aage raqīb-e-siyāh-rū kyā hai

hue jo dost tum apne to phir adū kyā hai

na jaane kitne hī aise haiñ ek tū kyā hai

baḌe-baḌoñ kī jahāñ meñ ab aabrū kyā hai

ragoñ meñ sirf tamavvuj kī aarzū kyā hai

jo inqalāb na laa.e to phir lahū kyā hai

bahār aate hī vahshat agar le añgḌā.ī

to phir ye zaḳhm ke Tāñke haiñ kyā rafū kyā hai

mileñ to pūchheñ ye arbāb-e-husn jauhar se

ġharaz nahīñ hai to duniyā-e-rañg-o-bū kyā hai

haqīqatoñ pe abhī haiñ majāz ke parde

jo ye haTeñ to samajh meñ phir aa.e to kyā hai

nigāh-e-rahmat-e-haq meñ ye aa ga.e varna

hamāre ashk-e-nadāmat kī aabrū kyā hai

jo haath dho chukā ḳhud zindagī se ai 'sho.ala'

namāz-e-ishq hai kyā us kī phir vuzū kyā hai

hamare aage raqib-e-siyah-ru kya hai

hue jo dost tum apne to phir adu kya hai

na jaane kitne hi aise hain ek tu kya hai

baDe-baDon ki jahan mein ab aabru kya hai

ragon mein sirf tamawwuj ki aarzu kya hai

jo inqalab na lae to phir lahu kya hai

bahaar aate hi wahshat agar le angDai

to phir ye zaKHm ke Tanke hain kya rafu kya hai

milen to puchhen ye arbab-e-husn jauhar se

gharaz nahin hai to duniya-e-rang-o-bu kya hai

haqiqaton pe abhi hain majaz ke parde

jo ye haTen to samajh mein phir aae to kya hai

nigah-e-rahmat-e-haq mein ye aa gae warna

hamare ashk-e-nadamat ki aabru kya hai

jo hath dho chuka KHud zindagi se ai 'shoala'

namaz-e-ishq hai kya us ki phir wuzu kya hai