hamare ahd ke chehre badal gae yaro

hamāre ahd ke chehre badal ga.e yaaro

ġhazab hai ḳhuun ke rishte badal ga.e yaaro

hamāre apne hue ġhair ġhair haiñ apne

rivāyatoñ ke tarīqe badal ga.e yaaro

badal rahe haiñ jo insān to ta.ajjub kyā

ye daur vo hai farishte badal ga.e yaaro

nishān jin pe lagā.e the jītne ke liye

na jaane kaise vo patte badal ga.e yaaro

bahut ġhurūr thā ham ko purāne sikkoñ par

ba-hukm-e-shāh vo sikke badal ga.e yaaro

hamārā aks bhī qātil hameñ nazar aaya

hamāre jab se aqīde badal ga.e yaaro

kahāñ talāsh karoge nuqūsh-e-pā mere

tamām shahr ke raste badal ga.e yaaro

na koī chor kā khaTkā na ġham luTeroñ kā

añdherī raat ke pahre badal ga.e yaaro

karegā ab vo zamāne se kyā gila ai 'fauq'

jab us ke apne hī saare badal ga.e yaaro

hamare ahd ke chehre badal gae yaro

ghazab hai KHun ke rishte badal gae yaro

hamare apne hue ghair ghair hain apne

riwayaton ke tariqe badal gae yaro

badal rahe hain jo insan to tajjub kya

ye daur wo hai farishte badal gae yaro

nishan jin pe lagae the jitne ke liye

na jaane kaise wo patte badal gae yaro

bahut ghurur tha hum ko purane sikkon par

ba-hukm-e-shah wo sikke badal gae yaro

hamara aks bhi qatil hamein nazar aaya

hamare jab se aqide badal gae yaro

kahan talash karoge nuqush-e-pa mere

tamam shahr ke raste badal gae yaro

na koi chor ka khaTka na gham luTeron ka

andheri raat ke pahre badal gae yaro

karega ab wo zamane se kya gila ai 'fauq'

jab us ke apne hi sare badal gae yaro