hamare ashk palkon par dhare hain

hamāre ashk palkoñ par dhare haiñ

mohabbat meñ qayāmat ke maze haiñ

mohabbat kī rah-e-dushvār par ham

ishāra pā ke terā chal rahe haiñ

hamārī talḳh guftārī pe mat jā

ki ham kaḌve magar dil ke khare haiñ

unheñ bar-ḳhud ġhalat kahnā hai bar-haq

jo mulk-o-qaum ke rahbar bane haiñ

kiye haiñ jis pe ham ne laakh ehsān

usī se jaan ke laale paḌe haiñ

jinheñ dekhe hue ik umr guzrī

mujhe shiddat se vo yaad aa rahe haiñ

nazar kyā aa.e un meñ jalva-e-haq

diloñ ke zang-ḳhurda aa.ine haiñ

faqīroñ ko hiqārat se na yuuñ dekh

inhīñ meñ kuchh bahut pahuñche hue haiñ

mire soz-e-tarannum se yakāyak

charāġh-e-kushta-e-shab jal uThe haiñ

hamārī raakh se sho.ale uThā do

hasīnoñ ham to jal jal kar bujhe haiñ

jinheñ Thukrā rahe haiñ ham bahar-gām

vo zarre mahr se chhūTe hue haiñ

abhī tak vaqt ham par mehrbāñ hai

ḳhudā ke fazl se achchhe bhale haiñ

ulajh kar rah ga.e haiñ vo masā.il

siyāsat ne jo paidā kar diye haiñ

unheñ 'maġhmūm' kab bhūlī hai duniyā

mohabbat meñ jo dīvāne hue haiñ

hamare ashk palkon par dhare hain

mohabbat mein qayamat ke maze hain

mohabbat ki rah-e-dushwar par hum

ishaara pa ke tera chal rahe hain

hamari talKH guftari pe mat ja

ki hum kaDwe magar dil ke khare hain

unhen bar-KHud ghalat kahna hai bar-haq

jo mulk-o-qaum ke rahbar bane hain

kiye hain jis pe hum ne lakh ehsan

usi se jaan ke lale paDe hain

jinhen dekhe hue ek umr guzri

mujhe shiddat se wo yaad aa rahe hain

nazar kya aae un mein jalwa-e-haq

dilon ke zang-KHurda aaine hain

faqiron ko hiqarat se na yun dekh

inhin mein kuchh bahut pahunche hue hain

mere soz-e-tarannum se yakayak

charagh-e-kushta-e-shab jal uThe hain

hamari rakh se shoale uTha do

hasinon hum to jal jal kar bujhe hain

jinhen Thukra rahe hain hum bahar-gam

wo zarre mahr se chhuTe hue hain

abhi tak waqt hum par mehrban hai

KHuda ke fazl se achchhe bhale hain

ulajh kar rah gae hain wo masail

siyasat ne jo paida kar diye hain

unhen 'maghmum' kab bhuli hai duniya

mohabbat mein jo diwane hue hain