hamare chahne wale rahe the donon taraf

hamāre chāhne vaale rahe the donoñ taraf

lakīr khīñchī ga.ī ham khaḌe the donoñ taraf

ḳhudā ke naam pe ik bhiiḌ ne hameñ kaaTā

kaTe bhī aise ki kaT kar gire the donoñ taraf

ḳhudā kā kaam mohabbat hai kahne vaale log

kaTār haath meñ le kar khaḌe the donoñ taraf

chhiḌī thī jang bahut pahle raushnī ke liye

charāġh jalte hue bujh ga.e the donoñ taraf

jahāñ pe raah meñ chhoḌā thā aap ne mujh ko

vahīñ se rāste kaTne lage the donoñ taraf

vo aspatāl meñ aa.ī thī dekhne mujh ko

tamām zaḳhm vahīñ bhar ga.e the donoñ taraf

hamare chahne wale rahe the donon taraf

lakir khinchi gai hum khaDe the donon taraf

KHuda ke nam pe ek bhiD ne hamein kaTa

kaTe bhi aise ki kaT kar gire the donon taraf

KHuda ka kaam mohabbat hai kahne wale log

kaTar hath mein le kar khaDe the donon taraf

chhiDi thi jang bahut pahle raushni ke liye

charagh jalte hue bujh gae the donon taraf

jahan pe rah mein chhoDa tha aap ne mujh ko

wahin se raste kaTne lage the donon taraf

wo aspatal mein aai thi dekhne mujh ko

tamam zaKHm wahin bhar gae the donon taraf