hamare dard ka usko jo pas ho jae

hamāre dard kā us ko jo paas ho jaa.e

hameñ bhī jiine kī thoḌī sī aas ho jaa.e

shahīd-e-ishq ko ġhusl-o-kafan mile na mile

magar vo dafn tire ghar ke paas ho jaa.e

tumhārā farz hai tum us pe Daal do parda

tumhāre sāmne jo be-libās ho jaa.e

mileñge tum ko inhīñ pattharoñ meñ hiire bhī

nigāh shart hai jauhar-shanās ho jaa.e

maiñ jāntā huuñ tirā āj-kal jo maqsad hai

hamāre zehnoñ pe taarī hirās ho jaa.e

tumhārī bazm meñ maanā guzār luuñ ik din

tamām umr kī lekin na pyaas ho jaa.e

vahāñ se apnī nazar pher kar guzar 'muztar'

jahāñ dikhāve kā tujh ko qayās ho jaa.e

hamare dard ka us ko jo pas ho jae

hamein bhi jine ki thoDi si aas ho jae

shahid-e-ishq ko ghusl-o-kafan mile na mile

magar wo dafn tere ghar ke pas ho jae

tumhaara farz hai tum us pe Dal do parda

tumhaare samne jo be-libas ho jae

milenge tum ko inhin pattharon mein hire bhi

nigah shart hai jauhar-shanas ho jae

main jaanta hun tera aaj-kal jo maqsad hai

hamare zehnon pe tari hiras ho jae

tumhaari bazm mein mana guzar lun ek din

tamam umr ki lekin na pyas ho jae

wahan se apni nazar pher kar guzar 'muztar'

jahan dikhawe ka tujh ko qayas ho jae