hamare dast-e-saKHa kasa-e-gadai hain

hamāre dast-e-saḳhā kāsa-e-gadā.ī haiñ

jo rahnumā the vo muhtāj-e-rahnumā.ī haiñ

jo mil bhī jaa.e to kaise uThā.eñge talvār

ye bad-nasīb to TuuTī huī kalā.ī haiñ

harīf jo bhī haiñ vo sab ke sab muqābil haiñ

jo vaar karte haiñ pīchhe se apne bhaa.ī haiñ

bas ek naam kī tasbīh roz-o-shab paḌhnā

mujhe ye lagtā hai ye dhaḌkaneñ parā.ī haiñ

ye aap hī kī navāzish hai mehrbānī hai

hamārī palkoñ pe jo sham.eñ jagmagā.ī haiñ

maiñ muntazir thā bahāroñ ke lauTne kā magar

mire dukhoñ kī ruteñ phir se lauT aa.ī haiñ

kahīñ bichhaḌne kī saa.at qarīb hī to nahīñ

'niyāz' āñkheñ achānak jo DabDabā.ī haiñ

hamare dast-e-saKHa kasa-e-gadai hain

jo rahnuma the wo muhtaj-e-rahnumai hain

jo mil bhi jae to kaise uThaenge talwar

ye bad-nasib to TuTi hui kalai hain

harif jo bhi hain wo sab ke sab muqabil hain

jo war karte hain pichhe se apne bhai hain

bas ek nam ki tasbih roz-o-shab paDhna

mujhe ye lagta hai ye dhaDkanen parai hain

ye aap hi ki nawazish hai mehrbani hai

hamari palkon pe jo shamen jagmagai hain

main muntazir tha bahaaron ke lauTne ka magar

mere dukhon ki ruten phir se lauT aai hain

kahin bichhaDne ki saat qarib hi to nahin

'niyaz' aankhen achanak jo DabDabai hain