hamare dil ko tera intizar kab se hai

hamāre dil ko tirā intizār kab se hai

ab aa bhī jā ki ye dil be-qarār kab se hai

tumhāre aane se gulshan mahak ye uThtā hai

tumhārī aas lagā.e bahār kab se hai

ab hans ke tanz ke tīroñ se vaar ḳhuub karo

tumheñ ḳhabar hai hameñ tum se pyaar kab se hai

mirā ye haal banā kar vo sab se pūchhtā hai

zarā batāo ye dīvāna-vār kab se hai

ye vo hī shaḳhs hai jo hañs ke baat kartā thā

tum hī kaho ki ye ab ashk-bār kab se hai

kahāñ talak yuuñ chhupāoge rāz-e-dil apnā

zamāne bhar ko ḳhabar hai ye pyaar kab se hai

ḳhudā kare vo ghaḌī jald aa.e ki jis meñ

kaheñ vo mujh se hameñ tum se pyaar kab se hai

tirī judā.ī kā ġham hañs ke sah rahā hai 'salīm'

ye tum samajhte ho ye ġham-gusār kab se hai

hamare dil ko tera intizar kab se hai

ab aa bhi ja ki ye dil be-qarar kab se hai

tumhaare aane se gulshan mahak ye uThta hai

tumhaari aas lagae bahaar kab se hai

ab hans ke tanz ke tiron se war KHub karo

tumhein KHabar hai hamein tum se pyar kab se hai

mera ye haal bana kar wo sab se puchhta hai

zara batao ye diwana-war kab se hai

ye wo hi shaKHs hai jo hans ke baat karta tha

tum hi kaho ki ye ab ashk-bar kab se hai

kahan talak yun chhupaoge raaz-e-dil apna

zamane bhar ko KHabar hai ye pyar kab se hai

KHuda kare wo ghaDi jald aae ki jis mein

kahen wo mujh se hamein tum se pyar kab se hai

teri judai ka gham hans ke sah raha hai 'salim'

ye tum samajhte ho ye gham-gusar kab se hai