hamare dil mein yaadon ko saliqe se rakha jae

hamāre dil meñ yādoñ ko salīqe se rakhā jaa.e

ki is kamre meñ phūloñ ko salīqe se rakhā jaa.e

masīhā.ī kī phir koī zarūrat hī nahīñ paḌtī

agar zaḳhmoñ pe ashkoñ ko salīqe se rakhā jaa.e

diloñ kī hukmarānī kā ye ik achchhā tarīqa hai

har ik jumle meñ lafzoñ ko salīqe se rakhā jaa.e

adab hai dīn-o-duniyā hai chhupā hai ilm bhī is meñ

mire bachcho kitāboñ ko salīqe se rakhā jaa.e

tirā ye ghar lagegā ḳhūbsūrat ai mire bhaa.ī

agar in saare rishtoñ ko salīqe se rakhā jaa.e

vo jaane vaalā jaane kaun se pal lauT kar aa.e

abhī raste pe āñkhoñ ko salīqe se rakhā jaa.e

barastī hai ḳhudā kī rahmateñ un kī duāoñ se

gharoñ meñ sab buzurgoñ ko salīqe se rakhā jaa.e

ġharībī dekhtī rahtī hai hasrat se khaḌī ho kar

dukānoñ meñ khilaunoñ ko salīqe se rakhā jaa.e

paḌosī kā bhī haq hai tujh pe itnā yaad rakh 'mohsin'

muñDeroñ par charāġhoñ ko salīqe se rakhā jaa.e

hamare dil mein yaadon ko saliqe se rakha jae

ki is kamre mein phulon ko saliqe se rakha jae

masihai ki phir koi zarurat hi nahin paDti

agar zaKHmon pe ashkon ko saliqe se rakha jae

dilon ki hukmarani ka ye ek achchha tariqa hai

har ek jumle mein lafzon ko saliqe se rakha jae

adab hai din-o-duniya hai chhupa hai ilm bhi is mein

mere bachcho kitabon ko saliqe se rakha jae

tera ye ghar lagega KHubsurat ai mere bhai

agar in sare rishton ko saliqe se rakha jae

wo jaane wala jaane kaun se pal lauT kar aae

abhi raste pe aankhon ko saliqe se rakha jae

barasti hai KHuda ki rahmaten un ki duaon se

gharon mein sab buzurgon ko saliqe se rakha jae

gharibi dekhti rahti hai hasrat se khaDi ho kar

dukanon mein khilaunon ko saliqe se rakha jae

paDosi ka bhi haq hai tujh pe itna yaad rakh 'mohsin'

munDeron par charaghon ko saliqe se rakha jae