hamare dil se wafa ka yaqin chhuT gaya

hamāre dil se vafā kā yaqīn chhūT gayā

makāñ kī qaid se āḳhir makīn chhūT gayā

maiñ apne sher usī ko sunāne aayā thā

jo ek shaḳhs pas-e-sāma.īn chhūT gayā

subūt-e-qatl miTā kar vo mutma.in thā bahut

lahū kā daaġh sar-e-āstīn chhūT gayā

usī se hai shajar-e-sāya-dār kī ummīd

vo ek daana jo zer-e-zamīn chhūT gayā

tumhāre baad mire dil kī kyā haqīqat hai

ye vo añgūThī hai jis kā nagīn chhūT gayā

'jamīl' mere liye vaqt ke mo.arriḳh ne

likhā thā shaah magar harf-e-shīn chhūT gayā

hamare dil se wafa ka yaqin chhuT gaya

makan ki qaid se aaKHir makin chhuT gaya

main apne sher usi ko sunane aaya tha

jo ek shaKHs pas-e-samain chhuT gaya

subut-e-qatl miTa kar wo mutmain tha bahut

lahu ka dagh sar-e-astin chhuT gaya

usi se hai shajar-e-saya-dar ki ummid

wo ek dana jo zer-e-zamin chhuT gaya

tumhaare baad mere dil ki kya haqiqat hai

ye wo anguThi hai jis ka nagin chhuT gaya

'jamil' mere liye waqt ke moarriKH ne

likha tha shah magar harf-e-shin chhuT gaya