hamare ganw ki baaten nirali hi nirali hain

hamāre gaañv kī bāteñ nirālī hī nirālī haiñ

kahīñ Takkar nahīñ us kā sukūnat meñ suhūlat meñ

na sar pe chhat kā saaya hai na khāne ko koī roTī

koī insāñ nahīñ dikhtā haqīqat meñ fazīlat meñ

hue haiñ faisle jhūTe rahe va.ade adhūre se

bahut badlāv dekhā hai adālat meñ siyāsat meñ

faqat do vaqt hai aisā jahāñ maañ ro ke kahtī hai

mirā beTā rahe mahfūz hijrat meñ musībat meñ

kabhī mazdūr se pūchho tumhārā haal kaisā hai

kahegā rah gayā huuñ bas thakāvaT meñ to ġhurbat meñ

badan par qīmtī kapḌe savārī bādshāhoñ sī

bahut maġhrūr sāhab haiñ riyāsat meñ hukūmat meñ

sharābī ko kaho momin sahābī ko kaho kāfir

nahīñ hai farq koī kyā najāsat meñ tahārat meñ

mire vālid kī kamzorī batātī ik haqīqat hai

guzar jaatī hai saarī umr mehnat meñ mashaqqat meñ

jise apne barādar kī ḳhabar-gīrī nahīñ aatī

na likhnā naam un kā rab uḳhuvvat meñ atūfat meñ

abhī to māfiyāoñ ke mazālim hī baraste the

hukūmat kyuuñ muāvin ban ga.ī vahshat meñ dahshat meñ

koī saanī nahīñ 'irfān' ke haidar kā duniyā meñ

fasāhat meñ balāġhat meñ kitābat meñ ḳhitābat meñ

hamare ganw ki baaten nirali hi nirali hain

kahin Takkar nahin us ka sukunat mein suhulat mein

na sar pe chhat ka saya hai na khane ko koi roTi

koi insan nahin dikhta haqiqat mein fazilat mein

hue hain faisle jhuTe rahe wade adhure se

bahut badlaw dekha hai adalat mein siyasat mein

faqat do waqt hai aisa jahan man ro ke kahti hai

mera beTa rahe mahfuz hijrat mein musibat mein

kabhi mazdur se puchho tumhaara haal kaisa hai

kahega rah gaya hun bas thakawaT mein to ghurbat mein

badan par qimti kapDe sawari baadshahon si

bahut maghrur sahab hain riyasat mein hukumat mein

sharabi ko kaho momin sahabi ko kaho kafir

nahin hai farq koi kya najasat mein tahaarat mein

mere walid ki kamzori batati ek haqiqat hai

guzar jati hai sari umr mehnat mein mashaqqat mein

jise apne baradar ki KHabar-giri nahin aati

na likhna nam un ka rab uKHuwwat mein atufat mein

abhi to mafiyaon ke mazalim hi baraste the

hukumat kyun muawin ban gai wahshat mein dahshat mein

koi sani nahin 'irfan' ke haidar ka duniya mein

fasahat mein balaghat mein kitabat mein KHitabat mein