hamare hisse mein jab se aaya hui hai wahshat bechaare gham ko

hamāre hisse meñ jab se aaya huī hai vahshat bechāre ġham ko

na jaane ham se hai 'ishq kitnā na jaane kitne haiñ pyāre ġham ko

chabā ke lafzoñ ko thuuk Daalā zabāneñ āñkhoñ kī kaaT Dālīñ

koī nahīñ ab samajh sakegā hamārī vahshat hamāre ġham ko

ḳhayāl meñ thā na ḳhvāb meñ thā jo un se mil kar huā hai ham se

har ek dukh ko bhulā diyā hai lagā diyā hai kināre ġham ko

ki jaise bachchoñ ko DaañT kar ham sudhār dete haiñ vaise hī kuchh

koī to piiTe koī to DāñTe koī to āḳhir sudhāre ġham ko

tamām fikreñ jabīñ se apnī utaar pheñkī thiiñ ham ne lekin

'ajīb hai sar pe chaḌh gayā hai vahāñ se koī utāre ġham ko

hamare hisse mein jab se aaya hui hai wahshat bechaare gham ko

na jaane hum se hai 'ishq kitna na jaane kitne hain pyare gham ko

chaba ke lafzon ko thuk Dala zabanen aankhon ki kaT Dalin

koi nahin ab samajh sakega hamari wahshat hamare gham ko

KHayal mein tha na KHwab mein tha jo un se mil kar hua hai hum se

har ek dukh ko bhula diya hai laga diya hai kinare gham ko

ki jaise bachchon ko DanT kar hum sudhaar dete hain waise hi kuchh

koi to piTe koi to DanTe koi to aaKHir sudhaare gham ko

tamam fikren jabin se apni utar phenki thin hum ne lekin

'ajib hai sar pe chaDh gaya hai wahan se koi utare gham ko