hamare jaise hi logon se shahr bhar gae hain

hamāre jaise hī logoñ se shahr bhar ga.e haiñ

vo log jin kī zarūrat thī saare mar ga.e haiñ

gharoñ se vo bhī sadā de to kaun niklegā

hai din kā vaqt abhī log kaam par ga.e haiñ

ki aa ga.e haiñ tirī shor-o-shar kī mahfil meñ

ham apnī apnī ḳhamoshī se kitnā Dar ga.e haiñ

unhīñ se siikh leñ tahzīb raah chalne kī

jo raah dene kī ḳhātir hamīñ Thahar ga.e haiñ

sabhī ko karte haiñ mil-jul ke rahne kī talqīn

kuchh apne aap meñ ham is qadar bikhar ga.e haiñ

nahīñ qubūl hameñ kāmyābī kā ye junūn

ye jānte bhī haiñ nākāmiyoñ pe sar ga.e haiñ

to kyuuñ satātī hai bigḌe dinoñ kī yaad ki ham

musālahat huī duniyā se ab sudhar ga.e haiñ

havā-e-dasht yahāñ kyuuñ hai itnā sannāTā

vo tere saare divāne batā kidhar ga.e haiñ

hamare jaise hi logon se shahr bhar gae hain

wo log jin ki zarurat thi sare mar gae hain

gharon se wo bhi sada de to kaun niklega

hai din ka waqt abhi log kaam par gae hain

ki aa gae hain teri shor-o-shar ki mahfil mein

hum apni apni KHamoshi se kitna Dar gae hain

unhin se sikh len tahzib rah chalne ki

jo rah dene ki KHatir hamin Thahar gae hain

sabhi ko karte hain mil-jul ke rahne ki talqin

kuchh apne aap mein hum is qadar bikhar gae hain

nahin qubul hamein kaamyabi ka ye junun

ye jaante bhi hain nakaamiyon pe sar gae hain

to kyun satati hai bigDe dinon ki yaad ki hum

musalahat hui duniya se ab sudhar gae hain

hawa-e-dasht yahan kyun hai itna sannaTa

wo tere sare diwane bata kidhar gae hain