hamare jism ka ye maqbara nahin Khaali

hamāre jism kā ye maqbara nahīñ ḳhālī

tumhārī yaad se ab tak huā nahīñ ḳhālī

farāġh ḳhud se milā to jahāñ se jā uljhā

mirā dimāġh kabhī bhī rahā nahīñ ḳhālī

duā ko haath uThāte hue huuñ ḳhālī haath

duā karo ki yuuñ ho.e duā nahīñ ḳhālī

kahīñ jalāne meñ shāmil kahīñ bujhāne meñ

ki apne kaam se pyāre havā nahīñ ḳhālī

ye kījiye ki muqaddar banā.iye ḳhud hī

hazār kaam haiñ us ko ḳhudā nahīñ ḳhālī

milā jo ham se vo do chaar ashk le hī gayā

ki ham se mil ke koī bhī gayā nahīñ ḳhālī

rahe na aañkh meñ aañsū to ḳhvāb ā.eñge

isī liye maiñ use kar rahā nahīñ ḳhālī

hamare jism ka ye maqbara nahin KHali

tumhaari yaad se ab tak hua nahin KHali

faragh KHud se mila to jahan se ja uljha

mera dimagh kabhi bhi raha nahin KHali

dua ko hath uThate hue hun KHali hath

dua karo ki yun hoe dua nahin KHali

kahin jalane mein shamil kahin bujhane mein

ki apne kaam se pyare hawa nahin KHali

ye kijiye ki muqaddar banaiye KHud hi

hazar kaam hain us ko KHuda nahin KHali

mila jo hum se wo do chaar ashk le hi gaya

ki hum se mil ke koi bhi gaya nahin KHali

rahe na aankh mein aansu to KHwab aaenge

isi liye main use kar raha nahin KHali