hamare nam se un ko mohabbaten kaisi

hamāre naam se un ko mohabbateñ kaisī

jo mar ga.e to kisī se shikāyateñ kaisī

ujaḌ ga.e haiñ havelī ke saare hañgāme

machā rakhī haiñ havā ne qayāmateñ kaisī

sarāpā pyaar haiñ ham to vafā-parast bhī haiñ

ham aise shaḳhs ke dil meñ kudūrateñ kaisī

kabhī tū ḳhud hī rutoñ kā mizāj badlegā

sitam ke zard dinoñ se baġhāvateñ kaisī

diloñ kā zahr umaDne lagā hai bātoñ meñ

har ek lafz se uryāñ haiñ nafrateñ kaisī

ḳhizāñ-rasīda daraḳhtoñ ke jism chhalnī haiñ

havā-e-shahr ne kī haiñ sharārteñ kaisī

ḳhud apne hoñT chabānā hī un kī aadat hai

hamāre dhyān ne dī haiñ halāvateñ kaisī

sadā-e-zarf to kānoñ meñ gūñjtī hī nahīñ

'niyāz' phir ye mohabbat meñ vahshateñ kaisī

hamare nam se un ko mohabbaten kaisi

jo mar gae to kisi se shikayaten kaisi

ujaD gae hain haweli ke sare hangame

macha rakhi hain hawa ne qayamaten kaisi

sarapa pyar hain hum to wafa-parast bhi hain

hum aise shaKHs ke dil mein kuduraten kaisi

kabhi tu KHud hi ruton ka mizaj badlega

sitam ke zard dinon se baghawaten kaisi

dilon ka zahr umaDne laga hai baaton mein

har ek lafz se uryan hain nafraten kaisi

KHizan-rasida daraKHton ke jism chhalni hain

hawa-e-shahr ne ki hain shararten kaisi

KHud apne honT chabana hi un ki aadat hai

hamare dhyan ne di hain halawaten kaisi

sada-e-zarf to kanon mein gunjti hi nahin

'niyaz' phir ye mohabbat mein wahshaten kaisi