hamare pas tha jo kuchh luTa ke baiTh rahe

hamāre paas thā jo kuchh luTā ke baiTh rahe

dayār-e-dil meñ qayāmat uThā ke baiTh rahe

vahāñ jahāñ par añdheroñ kā kārvāñ utrā

kisī umiid pe sham'eñ jalā ke baiTh rahe

tumhāre hijr meñ jo kuchh guzar ga.ī guzrī

tumhāre vasl meñ ham ghar jalā ke baiTh rahe

kahāñ ke dār-o-rasan aur kyā shahīd-e-vafā

ye kārobār bhī kal phir uThā ke baiTh rahe

ḳhabar na thī ki zamāñ-āshkār the jo kabhī

vo parda-dār to chilman girā ke baiTh rahe

kaḌaktī dhuup meñ dasht-e-safar se ghabrā kar

fasīl-e-shahr ke saa.e meñ aa ke baiTh rahe

zamāna kuchh to kahe un se jo ba-hīla-e-dil

kisī kī bazm se ham ko uThā ke baiTh rahe

girī hai ghar kī kaḌī par kaḌī to ghar vaale

ġhubār-e-sharm meñ chehre chhupā ke baiTh rahe

vo tifl-e-maktab-e-rasm-e-vafā hamīñ to na the

jo apnī yādoñ kā mela lagā ke baiTh rahe

hai bāzgasht hī shāyad mirī fuġhāñ kā javāb

''ḳhudā'' to apnī hī qabroñ pe jā ke baiTh rahe

vo nā-ḳhudā the zamāne meñ mo'atabar jo sadā

samundaroñ meñ safīne bahā ke baiTh rahe

hamare pas tha jo kuchh luTa ke baiTh rahe

dayar-e-dil mein qayamat uTha ke baiTh rahe

wahan jahan par andheron ka karwan utra

kisi umid pe sham'en jala ke baiTh rahe

tumhaare hijr mein jo kuchh guzar gai guzri

tumhaare wasl mein hum ghar jala ke baiTh rahe

kahan ke dar-o-rasan aur kya shahid-e-wafa

ye karobar bhi kal phir uTha ke baiTh rahe

KHabar na thi ki zaman-ashkar the jo kabhi

wo parda-dar to chilman gira ke baiTh rahe

kaDakti dhup mein dasht-e-safar se ghabra kar

fasil-e-shahr ke sae mein aa ke baiTh rahe

zamana kuchh to kahe un se jo ba-hila-e-dil

kisi ki bazm se hum ko uTha ke baiTh rahe

giri hai ghar ki kaDi par kaDi to ghar wale

ghubar-e-sharm mein chehre chhupa ke baiTh rahe

wo tifl-e-maktab-e-rasm-e-wafa hamin to na the

jo apni yaadon ka mela laga ke baiTh rahe

hai bazgasht hi shayad meri fughan ka jawab

KHuda to apni hi qabron pe ja ke baiTh rahe

wo na-KHuda the zamane mein mo'atabar jo sada

samundaron mein safine baha ke baiTh rahe