hamare sath zamana hai tum bhi sath chalo

hamāre saath zamāna hai tum bhī saath chalo

jo hausla hī baḌhānā hai tum bhī saath chalo

hameñ gar apnā banānā hai tum bhī saath chalo

jo dil kā dard miTānā hai tum bhī saath chalo

jahāñ panāh har ik ḳhasta dil ko miltī hai

vahī hamārā Thikānā hai tum bhī saath chalo

jahāñ meñ adl-o-muravvat kahāñ haiñ poshīda

unhīñ ko DhūñD ke laanā hai tum bhī saath chalo

ḳhulūs uns-o-mohabbat kī rahguzāroñ se

jafā kā naqsh miTānā hai tum bhī saath chalo

zamāna niiñd meñ ġhaflat kī so rahā hai ise

jhiñjhoḌnā hai jagānā hai tum bhī saath chalo

phir aaj 'josh' ne ye kah diyā sar-e-mahfil

ġhazal ik un ko sunānā hai tum bhī saath chalo

hamare sath zamana hai tum bhi sath chalo

jo hausla hi baDhana hai tum bhi sath chalo

hamein gar apna banana hai tum bhi sath chalo

jo dil ka dard miTana hai tum bhi sath chalo

jahan panah har ek KHasta dil ko milti hai

wahi hamara Thikana hai tum bhi sath chalo

jahan mein adl-o-murawwat kahan hain poshida

unhin ko DhunD ke lana hai tum bhi sath chalo

KHulus uns-o-mohabbat ki rahguzaron se

jafa ka naqsh miTana hai tum bhi sath chalo

zamana nind mein ghaflat ki so raha hai ise

jhinjhoDna hai jagana hai tum bhi sath chalo

phir aaj 'josh' ne ye kah diya sar-e-mahfil

ghazal ek un ko sunana hai tum bhi sath chalo