hamare sar se wo tufan kahin guzar gae hain

hamāre sar se vo tūfāñ kahīñ guzar ga.e haiñ

chaḌhe hue the jo dariyā sabhī utar ga.e haiñ

rahe nahīñ haiñ kabhī ek haal par qaa.em

simaT ga.e haiñ kabhī aur kabhī bikhar ga.e haiñ

usuul hai ki ḳhalā yūñhī rah nahīñ saktā

hue haiñ ḳhud se jo ḳhālī so tujh se bhar ga.e haiñ

ruke bhī haiñ to dobāra ravāngī ke liye

chale bhī haiñ to kahīñ raah meñ Thahar ga.e haiñ

tumhāre ahd-e-taġhāful meñ jī rahe haiñ abhī

huā hai kuchh tumheñ hāsil na ham hī mar ga.e haiñ

nikal paḌe to phir apnā surāġh mil na sakā

tumhāre paas hī pahuñche na apne ghar ga.e haiñ

vahī hai dā.era-e-ḳhvāb ibtidā-e-safar

usī qadar hue vāpas bhī jis qadar ga.e haiñ

isī kamī kā hai ehsās aur hairānī

haiñ aur to sabhī maujūd ham kidhar ga.e haiñ

'zafar' hamārī mohabbat kā silsila hai ajiib

jahāñ chhupā nahīñ paa.e vahāñ mukar ga.e haiñ

hamare sar se wo tufan kahin guzar gae hain

chaDhe hue the jo dariya sabhi utar gae hain

rahe nahin hain kabhi ek haal par qaem

simaT gae hain kabhi aur kabhi bikhar gae hain

usul hai ki KHala yunhi rah nahin sakta

hue hain KHud se jo KHali so tujh se bhar gae hain

ruke bhi hain to dobara rawangi ke liye

chale bhi hain to kahin rah mein Thahar gae hain

tumhaare ahd-e-taghaful mein ji rahe hain abhi

hua hai kuchh tumhein hasil na hum hi mar gae hain

nikal paDe to phir apna suragh mil na saka

tumhaare pas hi pahunche na apne ghar gae hain

wahi hai daera-e-KHwab ibtida-e-safar

usi qadar hue wapas bhi jis qadar gae hain

isi kami ka hai ehsas aur hairani

hain aur to sabhi maujud hum kidhar gae hain

'zafar' hamari mohabbat ka silsila hai ajib

jahan chhupa nahin pae wahan mukar gae hain