hamare shahr-e-adab mein chali hawa kya hai

hamāre shahr-e-adab meñ chalī havā kyā hai

ye kaisā daur hai yārab hameñ huā kyā hai

usī ne aag lagā.ī hai saarī bastī meñ

vahī ye pūchh rahā hai ki mājrā kyā hai

ye terā zarf ki tū phir bhī bad-gumāñ na huā

sivā.e dard ke maiñ ne tujhe diyā kyā hai

lapak ke chhīn le haq apnā kam-savādoñ se

baḌhā ke haath uThā jaam dekhtā kyā hai

bhulā diyā hai jo tum ne to koī baat nahīñ

magar maiñ jāntā āḳhir mirī ḳhatā kyā hai

ajiib shaḳhs hai kirdār māñgtā hai mirā

sivā.e is ke mire paas ab bachā kyā hai

kured kar mere zaḳhmoñ ko yuuñ savāl na kar

tujhe ḳhabar hai to phir mujh se pūchhtā kyā hai

matā-e-ġham ko bachā rakh chhupā ke siine meñ

tū is ḳhazāne ko auroñ meñ bāñTtā kyā hai

hazār ne.amateñ us ne tujhe atā kī haiñ

ab aur 'chāñd' tū is dar se māñgtā kyā hai

hamare shahr-e-adab mein chali hawa kya hai

ye kaisa daur hai yarab hamein hua kya hai

usi ne aag lagai hai sari basti mein

wahi ye puchh raha hai ki majra kya hai

ye tera zarf ki tu phir bhi bad-guman na hua

siwae dard ke main ne tujhe diya kya hai

lapak ke chhin le haq apna kam-sawadon se

baDha ke hath uTha jam dekhta kya hai

bhula diya hai jo tum ne to koi baat nahin

magar main jaanta aaKHir meri KHata kya hai

ajib shaKHs hai kirdar mangta hai mera

siwae is ke mere pas ab bacha kya hai

kured kar mere zaKHmon ko yun sawal na kar

tujhe KHabar hai to phir mujh se puchhta kya hai

mata-e-gham ko bacha rakh chhupa ke sine mein

tu is KHazane ko auron mein banTta kya hai

hazar neamaten us ne tujhe ata ki hain

ab aur 'chand' tu is dar se mangta kya hai