hamare TuTne ka isko bhi kuchh gham nahin hota

hamāre TūTne kā is ko bhī kuchh ġham nahīñ hotā

ye vo patthar hai jo fariyād se bhī nam nahīñ hotā

kabhī pattā bhī shab ke āñsuoñ se nam nahīñ hotā

koī qatra kisī dariyā se lekin kam nahīñ hotā

hameñ is 'ahd meñ jiine kā koī ġham nahīñ hotā

ġhazal ke aa.ine meñ sub.h kā mātam nahīñ hotā

charāġhoñ se hamāre zaḳhm ko raushan na kar itnā

kabhī sūraj nikalne se añdherā kam nahīñ hotā

hamāre shahr meñ khilte haiñ zaḳhmoñ ke gulāb ab bhī

tumhāre shahr meñ aisā koī mausam nahīñ hotā

kabhī to hosh ke 'ālam meñ tanhā.ī sī hotī hai

kabhī tanhā.iyoñ meñ hosh kā 'ālam nahīñ hotā

kabhī shādābiyāñ ḳhud mausamoñ se jang kartī haiñ

kabhī ujḌe hue rangoñ kā bhī mausam nahīñ hotā

koī shikva nahīñ kartā kisī kī sang-bārī kā

mizāj-e-ā.ina 'arshad' kabhī barham nahīñ hotā

hamare TuTne ka is ko bhi kuchh gham nahin hota

ye wo patthar hai jo fariyaad se bhi nam nahin hota

kabhi patta bhi shab ke aansuon se nam nahin hota

koi qatra kisi dariya se lekin kam nahin hota

hamein is 'ahd mein jine ka koi gham nahin hota

ghazal ke aaine mein subh ka matam nahin hota

charaghon se hamare zaKHm ko raushan na kar itna

kabhi suraj nikalne se andhera kam nahin hota

hamare shahr mein khilte hain zaKHmon ke gulab ab bhi

tumhaare shahr mein aisa koi mausam nahin hota

kabhi to hosh ke 'alam mein tanhai si hoti hai

kabhi tanhaiyon mein hosh ka 'alam nahin hota

kabhi shadabiyan KHud mausamon se jang karti hain

kabhi ujDe hue rangon ka bhi mausam nahin hota

koi shikwa nahin karta kisi ki sang-bari ka

mizaj-e-aina 'arshad' kabhi barham nahin hota