hamare waste koi jadid KHwab nahin

hamāre vāste koī jadīd ḳhvāb nahīñ

mazīd ḳhvāb nahīñ ab mazīd ḳhvāb nahīñ

har ek rabt ko mismār kar gayā thā vo

ye hādisa thā nihāyat shadīd ḳhvāb nahīñ

maiñ apnī āñkhoñ ko jhūTā dilāsa kaise duuñ

jab us ke ḳhvāb kā bhī chashm-dīd ḳhvāb nahīñ

ye saare dirham-o-dīnār le ke jaao miyāñ

hamāre ḳhvāb koī zar-ḳharīd ḳhvāb nahīñ

tum apne aane kā vā'da karo qasam khā kar

navīd-e-vasl ho sachchī navīd ḳhvāb nahīñ

ham us kā ḳhvāb bhī dekheñ to bā-vazū rah kar

kisī bhī haal meñ karte palīd ḳhvāb nahīñ

ab us ke husn kī tasvīr kyā banā.eñ ham

haqīqatoñ se to hotā kashīd ḳhvāb nahīñ

ham apnī āñkheñ khulī hī rakheñ agar 'ishrat'

to koī ḳhvāb hamārā ba'īd ḳhvāb nahīñ

hamare waste koi jadid KHwab nahin

mazid KHwab nahin ab mazid KHwab nahin

har ek rabt ko mismar kar gaya tha wo

ye hadisa tha nihayat shadid KHwab nahin

main apni aankhon ko jhuTa dilasa kaise dun

jab us ke KHwab ka bhi chashm-did KHwab nahin

ye sare dirham-o-dinar le ke jao miyan

hamare KHwab koi zar-KHarid KHwab nahin

tum apne aane ka wa'da karo qasam kha kar

nawid-e-wasl ho sachchi nawid KHwab nahin

hum us ka KHwab bhi dekhen to ba-wazu rah kar

kisi bhi haal mein karte palid KHwab nahin

ab us ke husn ki taswir kya banaen hum

haqiqaton se to hota kashid KHwab nahin

hum apni aankhen khuli hi rakhen agar 'ishrat'

to koi KHwab hamara ba'id KHwab nahin