hamari aaj-kal himmat faqat aah-o-fughan tak hai

hamārī āj-kal himmat faqat āh-o-fuġhāñ tak hai

dil-e-betāb kākul josh bas is ke bayāñ tak hai

qadam rakkhā jo maidān-e-amal meñ Thokareñ khā.īñ

hamāre hausloñ kī shaan bas dil se zabāñ tak hai

ilāhī phir na hogā abr-barq-o-ra.ad gulshan meñ

musībat is jagah kyā sirf mere āshiyāñ tak hai

kabhī ik din ḳhudārā sarguzisht-e-āshiqāñ sun lo

ki un kā naam baaqī ab faqat is dāstāñ tak hai

ta.ajjub hai nazar aatā nahīñ tujh ko sitam apnā

tire dar par abhī baaqī mire ḳhuuñ kā nishāñ tak hai

jafā aur zulm kī fariyād le kar ham kahāñ jaa.eñ

rasā.ī ġhair mumkin tere sañg-e-āstāñ tak hai

tirā zulm-o-sitam tujh ko nahīñ mālūm ai zālim

tirī bedād kā ik shor saqf-e-āsmāñ tak hai

chaleñge kaam is duniyā ke mere ba.ad bhī lekin

tirī mahfil kī ye raunaq faqat mujh ḳhasta-jāñ tak hai

ḳhizāñ jā.egī jis din phir vahī josh-e-junūñ hogā

ḳhamoshī bāġh-e-ālam meñ mire ḳhvāb-e-girāñ tak hai

adad se kah do jab chāhe hamārā imtihāñ kar le

hameñ bhī dekhnā hai hausla us kā kahāñ tak hai

hamārī haq-parastī kī misāl aisī hai ai 'hāfiz'

rahegā zikr baaqī ye jahāñ jab tak jahāñ tak hai

hamari aaj-kal himmat faqat aah-o-fughan tak hai

dil-e-betab kakul josh bas is ke bayan tak hai

qadam rakkha jo maidan-e-amal mein Thokaren khain

hamare hauslon ki shan bas dil se zaban tak hai

ilahi phir na hoga abr-barq-o-rad gulshan mein

musibat is jagah kya sirf mere aashiyan tak hai

kabhi ek din KHudara sarguzisht-e-ashiqan sun lo

ki un ka nam baqi ab faqat is dastan tak hai

tajjub hai nazar aata nahin tujh ko sitam apna

tere dar par abhi baqi mere KHun ka nishan tak hai

jafa aur zulm ki fariyaad le kar hum kahan jaen

rasai ghair mumkin tere sang-e-astan tak hai

tera zulm-o-sitam tujh ko nahin malum ai zalim

teri bedad ka ek shor saqf-e-asman tak hai

chalenge kaam is duniya ke mere baad bhi lekin

teri mahfil ki ye raunaq faqat mujh KHasta-jaan tak hai

KHizan jaegi jis din phir wahi josh-e-junun hoga

KHamoshi bagh-e-alam mein mere KHwab-e-giran tak hai

adad se kah do jab chahe hamara imtihan kar le

hamein bhi dekhna hai hausla us ka kahan tak hai

hamari haq-parasti ki misal aisi hai ai 'hafiz'

rahega zikr baqi ye jahan jab tak jahan tak hai