hamari aankhen bhi sahib ajib kitni hain

hamārī āñkheñ bhī sāhib ajiib kitnī haiñ

ki dil jo ro.e to kam-baḳht hañsne lagtī haiñ

tumhāre shahr se chaliye ki tañg-dastī ne

tumhāre shahr kī galiyāñ bhī tañg kar dī haiñ

ye ham haiñ be-hunarāñ dekhiye hunar-mandī

jo koī kaam kareñ ham to poreñ jaltī haiñ

na is kā vasl milā aur na rozgār yahāñ

so pahle hijr-zada the aur ab ke hijratī haiñ

to shāh-zādī ko laa.eñ vo mahv-e-ḳhvāb hai kyā

hameñ yaqīñ nahīñ pariyāñ bhī jhuuT boltī haiñ

hamari aankhen bhi sahib ajib kitni hain

ki dil jo roe to kam-baKHt hansne lagti hain

tumhaare shahr se chaliye ki tang-dasti ne

tumhaare shahr ki galiyan bhi tang kar di hain

ye hum hain be-hunaran dekhiye hunar-mandi

jo koi kaam karen hum to poren jalti hain

na is ka wasl mila aur na rozgar yahan

so pahle hijr-zada the aur ab ke hijrati hain

to shah-zadi ko laen wo mahw-e-KHwab hai kya

hamein yaqin nahin pariyan bhi jhuT bolti hain