hamari arz-e-matlab par tera bezar ho jaana

hamārī arz-e-matlab par tirā bezār ho jaanā

zarā sī baat par āmāda-e-paikār ho jaanā

kisī ke ishq meñ dil kā kabhī bīmār ho jaanā

kabhī āñkhoñ kā apnī tālib-e-dīdār ho jaanā

tirī āñkhoñ kā āñkhoñ se hamārī chaar ho jaanā

ye goyā hogā barchhī kā jigar se paar ho jaanā

mirā dil halqa-e-zulm-o-sitam se chhuT sake kyūñkar

mizha kī jumbihsoñ kā gardish-e-parkār ho jaanā

kisī se bhuul kar ik baar bhī milnā qayāmat hai

kisī par aap kā lutf-o-karam sau baar ho jaanā

ta.ajjub kuchh nahīñ is par ki shauq-e-dīd-e-jānāñ meñ

mirī āñkhoñ kā sū-e-rauzan-e-dīvār ho jaanā

nahīñ hai ye karishma husn kā to aur phir kyā hai

tirī mahfil meñ merā daf.atan bīmār ho jaanā

kamāl-e-husn ko jab hai zavāl-e-husn bhī lāzim

to kyā dushvār hai phir in guloñ kā ḳhaar ho jaanā

zarā dekho udhar miinā udhar sāġhar udhar ḳhum hai

ghaTā uTThī hai kaalī mai-kasho hushiyār ho jaanā

zamāne kī na.ī bātoñ meñ shāmil ye bhī hai zāhid

ki rahn-e-mai tumhārā jubba-o-dastār ho jaanā

sahar chauñkā.e jis dam ḳhvāb se ai qāfile vaalo

vahīñ kas kar kamar chalne ko tum tayyār ho jaanā

gulistāñ se nikal kar ye sharaf paanā zahe-qismat

guloñ kā mah-jabīnoñ ke gale kā haar ho jaanā

tasavvur bhī mujhe mizhgān-o-abrū kā qayāmat hai

kabhī to tiir ban jaanā kabhī talvār ban jaanā

mohabbat kā karishma thā tasavvur kī ināyat thī

hamārā daf.atan mahv-e-ḳhayāl-e-yār ho jaanā

jise dekho vahī ab ārzū-mand-e-shahādat hai

ġhazab hai abrū-e-ḳhamdār kā talvār ho jaanā

bahut kuchh sāqī-e-bazm-e-azal kī mehrbānī thī

hamārā jazba-e-tauhīd se sarshār ho jaanā

dil-e-pur-shauq ko taḌpā gayā kuchh aur ai 'hāmid'

hayā kā anjuman meñ māna-e-guftār ho jaanā

hamari arz-e-matlab par tera bezar ho jaana

zara si baat par aamada-e-paikar ho jaana

kisi ke ishq mein dil ka kabhi bimar ho jaana

kabhi aankhon ka apni talib-e-didar ho jaana

teri aankhon ka aankhon se hamari chaar ho jaana

ye goya hoga barchhi ka jigar se par ho jaana

mera dil halqa-e-zulm-o-sitam se chhuT sake kyunkar

mizha ki jumbihson ka gardish-e-parkar ho jaana

kisi se bhul kar ek bar bhi milna qayamat hai

kisi par aap ka lutf-o-karam sau bar ho jaana

tajjub kuchh nahin is par ki shauq-e-did-e-jaanan mein

meri aankhon ka su-e-rauzan-e-diwar ho jaana

nahin hai ye karishma husn ka to aur phir kya hai

teri mahfil mein mera dafatan bimar ho jaana

kamal-e-husn ko jab hai zawal-e-husn bhi lazim

to kya dushwar hai phir in gulon ka KHar ho jaana

zara dekho udhar mina udhar saghar udhar KHum hai

ghaTa uTThi hai kali mai-kasho hushiyar ho jaana

zamane ki nai baaton mein shamil ye bhi hai zahid

ki rahn-e-mai tumhaara jubba-o-dastar ho jaana

sahar chaunkae jis dam KHwab se ai qafile walo

wahin kas kar kamar chalne ko tum tayyar ho jaana

gulistan se nikal kar ye sharaf pana zahe-qismat

gulon ka mah-jabinon ke gale ka haar ho jaana

tasawwur bhi mujhe mizhgan-o-abru ka qayamat hai

kabhi to tir ban jaana kabhi talwar ban jaana

mohabbat ka karishma tha tasawwur ki inayat thi

hamara dafatan mahw-e-KHayal-e-yar ho jaana

jise dekho wahi ab aarzu-mand-e-shahadat hai

ghazab hai abru-e-KHamdar ka talwar ho jaana

bahut kuchh saqi-e-bazm-e-azal ki mehrbani thi

hamara jazba-e-tauhid se sarshaar ho jaana

dil-e-pur-shauq ko taDpa gaya kuchh aur ai 'hamid'

haya ka anjuman mein mana-e-guftar ho jaana