hamari baat ka ulTa asar na paD jae

hamārī baat kā ulTā asar na paḌ jaa.e

ye dil kā bojh kahīñ jaan par na paḌ jaa.e

tamām raat sulagtā huuñ aur sochtā huuñ

kisī charāġh kī mujh par nazar na paḌ jaa.e

isī ḳhayāl se zaḳhmoñ kī rū-numā.ī na kī

ki imtihāñ meñ kahīñ chāra-gar na paḌ jaa.e

phir is ke baa'd kahāñ jā.eñge ye sāya-pasand

idhar kī dhuup kisī din udhar na paḌ jaa.e

lagī to hai ye barābar mire ta.āqub meñ

gale havā ke kahīñ ye safar na paḌ jaa.e

ye dasht-e-ishq hai ġhā.er zarā ḳhayāl rahe

tumhārā paañv kisī din idhar na paḌ jaa.e

hamari baat ka ulTa asar na paD jae

ye dil ka bojh kahin jaan par na paD jae

tamam raat sulagta hun aur sochta hun

kisi charagh ki mujh par nazar na paD jae

isi KHayal se zaKHmon ki ru-numai na ki

ki imtihan mein kahin chaara-gar na paD jae

phir is ke ba'd kahan jaenge ye saya-pasand

idhar ki dhup kisi din udhar na paD jae

lagi to hai ye barabar mere taaqub mein

gale hawa ke kahin ye safar na paD jae

ye dasht-e-ishq hai ghaer zara KHayal rahe

tumhaara panw kisi din idhar na paD jae