hamari jagti aankhon mein KHwab sa kya tha

hamārī jāgtī āñkhoñ meñ ḳhvāb sā kyā thā

ghanerī shab meñ ugā āftāb sā kyā thā

kahīñ huī to thī halchal kahīñ pe gahre meñ

bigaḌ bigaḌ ke vo bantā habāb sā kyā thā

tamām jism meñ hotī haiñ larzisheñ kyā kyā

savād-e-jāñ meñ ye bajtā rabāb sā kyā thā

hamārī pyaas pe barsā añdhere ujiyāle

vo kuchh ghaTāoñ sā kuchh māhtāb sā kyā thā

zarā sī der bhī ruktā to kuchh patā chaltā

vo rang thā ki thī ḳhushbū sahāb sā kyā thā

ye tishnagī kā safar kaT gayā hai jis ke tufail

vo dasht dasht chhalaktā sarāb sā kyā thā

tamām 'umr khapāyā hai jis meñ sar 'bilqīs'

bhalā vo be-sar-o-pā sī kitāb sā kyā thā

hamari jagti aankhon mein KHwab sa kya tha

ghaneri shab mein uga aaftab sa kya tha

kahin hui to thi halchal kahin pe gahre mein

bigaD bigaD ke wo banta habab sa kya tha

tamam jism mein hoti hain larzishen kya kya

sawad-e-jaan mein ye bajta rabab sa kya tha

hamari pyas pe barsa andhere ujiyale

wo kuchh ghaTaon sa kuchh mahtab sa kya tha

zara si der bhi rukta to kuchh pata chalta

wo rang tha ki thi KHushbu sahab sa kya tha

ye tishnagi ka safar kaT gaya hai jis ke tufail

wo dasht dasht chhalakta sarab sa kya tha

tamam 'umr khapaya hai jis mein sar 'bilqis'

bhala wo be-sar-o-pa si kitab sa kya tha