hamari nind koi so gaya hai kya

hamārī niiñd koī so gayā hai kyā

jo thā ḳhvāboñ kā zevar kho gayā hai kyā

sabhī chehroñ pe hai kyoñ bad-havāsī ab

sabhī kā jaise yaañ kuchh kho gayā hai kyā

koī fariyād ab suntā nahīñ vo bhī

kahīñ par chief justice ho gayā hai kyā

ye kyoñ tālāb dariyā aur samundar haiñ

yahāñ par koī aa kar ro gayā hai kyā

'qamar' kā aa.ine meñ sirf chehra hai

sarāpā bhiiḌ meñ ab kho gayā hai kyā

yuuñ hī shādāb chehra ho nahīñ saktā

chhalak kar ashk chehra dho gayā hai kyā

uge haiñ chār-sū nafrat ke paude kyoñ

diloñ meñ zahr koī bo gayā hai kyā

hamari nind koi so gaya hai kya

jo tha KHwabon ka zewar kho gaya hai kya

sabhi chehron pe hai kyon bad-hawasi ab

sabhi ka jaise yan kuchh kho gaya hai kya

koi fariyaad ab sunta nahin wo bhi

kahin par chief justice ho gaya hai kya

ye kyon talab dariya aur samundar hain

yahan par koi aa kar ro gaya hai kya

'qamar' ka aaine mein sirf chehra hai

sarapa bhiD mein ab kho gaya hai kya

yun hi shadab chehra ho nahin sakta

chhalak kar ashk chehra dho gaya hai kya

uge hain chaar-su nafrat ke paude kyon

dilon mein zahr koi bo gaya hai kya