hamari ramlila bas yahi hai

hamārī rāmlīlā bas yahī hai

hamārī chhat hamī par aa paḌī hai

samay rukne pe bhī ye chal rahī hai

bahut ye ek behūda ghaḌī hai

dar-o-dīvār-o-chhat jab gir chuke haiñ

to phir kis aas par sīḌhī khaḌī hai

tire bandoñ se yuuñ lagtā hai aise

ki ab ḳhud se hī terī dostī hai

batā kaise yahāñ hogā añdherā

makāñ meñ jab tumhārī raushnī hai

hamāre ḳhvāb kab ke so chuke haiñ

hamārī niiñd bhī ab jāgtī hai

agar hai dā.era hastī hamārī

tumhāre gird hī to ghūmtī hai

hamārī har ghaḌī ḳhud se laḌā.ī

bhalā ye zindagī bhī zindagī hai

hamārī pusht par hamla huā hai

hamārī kab kisī se dostī hai

hameñ ḳhush dekh kar hairān kyoñ ho

tumhāre husn kī ye chāshnī hai

sar-e-taslīm ḳham rakhnā hai 'mansūr'

hamāre baḳht meñ bas naukrī hai

hamari ramlila bas yahi hai

hamari chhat hami par aa paDi hai

samay rukne pe bhi ye chal rahi hai

bahut ye ek behuda ghaDi hai

dar-o-diwar-o-chhat jab gir chuke hain

to phir kis aas par siDhi khaDi hai

tere bandon se yun lagta hai aise

ki ab KHud se hi teri dosti hai

bata kaise yahan hoga andhera

makan mein jab tumhaari raushni hai

hamare KHwab kab ke so chuke hain

hamari nind bhi ab jagti hai

agar hai daera hasti hamari

tumhaare gird hi to ghumti hai

hamari har ghaDi KHud se laDai

bhala ye zindagi bhi zindagi hai

hamari pusht par hamla hua hai

hamari kab kisi se dosti hai

hamein KHush dekh kar hairan kyon ho

tumhaare husn ki ye chashni hai

sar-e-taslim KHam rakhna hai 'mansur'

hamare baKHt mein bas naukri hai