hamari ruh ne jab us badan ko dekha tha

hamārī ruuh ne jab us badan ko dekhā thā

to yuuñ lagā ki kisī ne kafan ko dekhā thā

vo kaun apnī nigāhoñ se baat kartā thā

vo ham ne bazm meñ kis ke suḳhan ko dekhā thā

kalī kalī pe fidā.ī likhā huā paayā

kuchh is adā se ḳhizāñ ne chaman ko dekhā thā

'ajīb haal thā fikr-e-ma'āsh meñ us ne

na terī zulf na dār-o-rasan ko dekhā thā

do chaar gaam qarīb aa ga.ī mire manzil

baġhaur us ne safar kī thakan ko dekhā thā

'atā huī thiiñ 'ajīb-o-ġharīb sī nazreñ

har ek zarre meñ ek anjuman ko dekhā thā

phir ek ḳhāme kī qirtās par paḌī thī nazar

phir ek jaam ne tishna-dahan ko dekhā thā

usī nigāh-e-'ināyat kī den huuñ 'asrār'

ki jis nigah se ġhazal ne dakan ko dekhā thā

hamari ruh ne jab us badan ko dekha tha

to yun laga ki kisi ne kafan ko dekha tha

wo kaun apni nigahon se baat karta tha

wo hum ne bazm mein kis ke suKHan ko dekha tha

kali kali pe fidai likha hua paya

kuchh is ada se KHizan ne chaman ko dekha tha

'ajib haal tha fikr-e-ma'ash mein us ne

na teri zulf na dar-o-rasan ko dekha tha

do chaar gam qarib aa gai mere manzil

baghaur us ne safar ki thakan ko dekha tha

'ata hui thin 'ajib-o-gharib si nazren

har ek zarre mein ek anjuman ko dekha tha

phir ek KHame ki qirtas par paDi thi nazar

phir ek jam ne tishna-dahan ko dekha tha

usi nigah-e-'inayat ki den hun 'asrar'

ki jis nigah se ghazal ne dakan ko dekha tha