hamari umron se raigani ko kha gai hai

hamārī umroñ se rā.igānī ko khā ga.ī hai

fazā mohabbat kī bad-gumānī ko khā ga.ī hai

bichhaḌne vaale palaT ke aayā to kin dinoñ meñ

ki jab judā.ī mirī javānī ko khā ga.ī hai

ye roz-o-shab apne ziist se ḳhālī kaT rahe haiñ

ma.āsh kī fikr zindagānī ko khā ga.ī hai

vo chāhtā thā ki us ke aage maiñ giḌgiḌā.ūñ

mirī anā us kī ḳhush-gumānī ko khā ga.ī hai

ḳhabar nahīñ ho rahī hameñ kuchh bhī is dhueñ meñ

bujhī huī hai yā aag paanī ko khā ga.ī hai

huā nahīñ aaj fart-e-ġham meñ bhī kār-girya

ye zabt kī ḳhū 'hasan' ravānī ko khā ga.ī hai

hamari umron se raigani ko kha gai hai

faza mohabbat ki bad-gumani ko kha gai hai

bichhaDne wale palaT ke aaya to kin dinon mein

ki jab judai meri jawani ko kha gai hai

ye roz-o-shab apne zist se KHali kaT rahe hain

maash ki fikr zindagani ko kha gai hai

wo chahta tha ki us ke aage main giDgiDaun

meri ana us ki KHush-gumani ko kha gai hai

KHabar nahin ho rahi hamein kuchh bhi is dhuen mein

bujhi hui hai ya aag pani ko kha gai hai

hua nahin aaj fart-e-gham mein bhi kar-girya

ye zabt ki KHu 'hasan' rawani ko kha gai hai