hamari zist ka ek ek bab khul jae

hamārī ziist kā ik ek baab khul jaa.e

ḳhudāyā ham pe hamārī kitāb khul jaa.e

phir is ke ba.ad ye dasht-o-daman bhalā kyā haiñ

jo ġhaur-o-fikr kareñ āftāb khul jaa.e

zamīñ pe rāsta aa.e nazar to kyā hai ajab

ye rāsta to miyāñ zer-e-āb khul jaa.e

ḳhatīb chīḳhtā hai roz hī sar-e-mimbar

majāl kyā hai jo ham par ḳhitāb khul jaa.e

na jaane kab se dar-e-ḳhvāb par hai qufl paḌā

ḳhudāyā ab to koī ham pe baab khul jaa.e

hamāre farz kā daftar to khol Daalā hai

varaq huqūq kā bhī ik janāb khul jaa.e

'obaid' denā hai ham sab ko imtihāñ ik din

duā.eñ kiije ki ham par nisāb khul jaa.e

hamari zist ka ek ek bab khul jae

KHudaya hum pe hamari kitab khul jae

phir is ke baad ye dasht-o-daman bhala kya hain

jo ghaur-o-fikr karen aaftab khul jae

zamin pe rasta aae nazar to kya hai ajab

ye rasta to miyan zer-e-ab khul jae

KHatib chiKHta hai roz hi sar-e-mimbar

majal kya hai jo hum par KHitab khul jae

na jaane kab se dar-e-KHwab par hai qufl paDa

KHudaya ab to koi hum pe bab khul jae

hamare farz ka daftar to khol Dala hai

waraq huquq ka bhi ek janab khul jae

'obaid' dena hai hum sab ko imtihan ek din

duaen kije ki hum par nisab khul jae