hamdam na Dar kahan ka zamana kahan ke log

hamdam na Dar kahāñ kā zamāna kahāñ ke log

haa.il na kab diloñ meñ hue darmiyāñ ke log

hai terī aañkh se bhī ziyāda kahīñ nasha

phir kyoñ niyāz-mand haiñ pīr-e-muġhāñ ke log

ruḳhsār-o-lab kā ālam-e-gul-āfrīñ na pūchh

qaa.il nahīñ rahe sahar-e-gulsitāñ ke log

kuchh yuuñ ujaḌ ga.iiñ haiñ nigāhoñ kī bastiyāñ

jaise tire hī saath the saare jahāñ ke log

vīrān ho ga.ī haram-o-dair kī fazā

aa baiThe terī bazm meñ har āstāñ ke log

āḳhir ḳhulūs kī bhī koī had zarūr hai

manzil pe kab rahe haiñ baham kārvāñ ke log

baiThā huuñ ik taraf kisī fankār kī tarah

kirdār ban ga.e haiñ mirī dāstāñ ke log

ye mere ham-ḳhayāl the ye mere ham-zabāñ

ab haiñ jo ham-navā kisī shīrīñ-bayāñ ke log

shahr-e-vafā thā dil ise kyā hādisa huā

'shaukat' kahāñ chale ga.e āḳhir yahāñ ke log

hamdam na Dar kahan ka zamana kahan ke log

hail na kab dilon mein hue darmiyan ke log

hai teri aankh se bhi ziyaada kahin nasha

phir kyon niyaz-mand hain pir-e-mughan ke log

ruKHsar-o-lab ka aalam-e-gul-afrin na puchh

qail nahin rahe sahar-e-gulsitan ke log

kuchh yun ujaD gain hain nigahon ki bastiyan

jaise tere hi sath the sare jahan ke log

viran ho gai haram-o-dair ki faza

aa baiThe teri bazm mein har aastan ke log

aaKHir KHulus ki bhi koi had zarur hai

manzil pe kab rahe hain baham karwan ke log

baiTha hun ek taraf kisi fankar ki tarah

kirdar ban gae hain meri dastan ke log

ye mere ham-KHayal the ye mere ham-zaban

ab hain jo ham-nawa kisi shirin-bayan ke log

shahr-e-wafa tha dil ise kya hadisa hua

'shaukat' kahan chale gae aaKHir yahan ke log