hamein fursat unhen fursat nahin hai

hameñ fursat unheñ fursat nahīñ hai

visāl-e-yār kī sūrat nahīñ hai

rahā barsoñ se apnā ghar samajh kar

qafas se kyoñ kahūñ ulfat nahīñ hai

nigāheñ pher lo nazreñ tumhārī

nazar badle mirī aadat nahīñ hai

havas meñ zar kī itnī be-hayā.ī

namak roTī meñ kyā rāhat nahīñ hai

na bachchoñ meñ rahī izzat baḌoñ kī

buzurgoñ meñ bhī vo shafqat nahīñ hai

rahūñgā ḳhaak pe ki ḳhaak kā huuñ

falak par uḌne kī hājat nahīñ hai

achānak raah meñ ruk kar vo bole

hameñ manzil kī ab chāhat nahīñ hai

ḳhabar auroñ se hī ‘mūnis’ kī le lo

tumheñ milne kī gar mohlat nahīñ hai

hamein fursat unhen fursat nahin hai

visal-e-yar ki surat nahin hai

raha barson se apna ghar samajh kar

qafas se kyon kahun ulfat nahin hai

nigahen pher lo nazren tumhaari

nazar badle meri aadat nahin hai

hawas mein zar ki itni be-hayai

namak roTi mein kya rahat nahin hai

na bachchon mein rahi izzat baDon ki

buzurgon mein bhi wo shafqat nahin hai

rahunga KHak pe ki KHak ka hun

falak par uDne ki hajat nahin hai

achanak rah mein ruk kar wo bole

hamein manzil ki ab chahat nahin hai

KHabar auron se hi ‘munis’ ki le lo

tumhein milne ki gar mohlat nahin hai