hamein ishq ab wo sikhane lage hain

hameñ 'ishq ab vo sikhāne lage haiñ

jinheñ chhoḌ ke log jaane lage haiñ

na sailāb aayā na tūfāñ hī koī

adāoñ se dil vo Dubāne lage haiñ

kaḌī dhuup meñ chhāñv zulfoñ kī un kī

hameñ to ye mausam suhāne lage haiñ

hare peḌ par gul khile laal niile

fazā ke ye manzar lubhāne lage haiñ

kisī ne na pūchhī tabī'at hamārī

yahāñ log rishta nibhāne lage haiñ

hameñ ab sharāboñ se matlab hī kyā hai

vo har rang apnā dikhāne lage haiñ

havā se bujhegā na dil kā diyā ab

use ḳhuuñ jigar kā pilāne lage haiñ

hameñ koī bhāne dubāra lagā hai

ke ham hijr ko ab Darāne lage haiñ

nahīñ 'ishq thā phir bhī bārāt aa.ī

samājoñ ko chashme purāne lage haiñ

kabhī bhī na hāreñge ham 'ishq vaale

hameñ jītne meñ zamāne lage haiñ

hamein 'ishq ab wo sikhane lage hain

jinhen chhoD ke log jaane lage hain

na sailab aaya na tufan hi koi

adaon se dil wo Dubane lage hain

kaDi dhup mein chhanw zulfon ki un ki

hamein to ye mausam suhane lage hain

hare peD par gul khile lal nile

faza ke ye manzar lubhane lage hain

kisi ne na puchhi tabi'at hamari

yahan log rishta nibhane lage hain

hamein ab sharabon se matlab hi kya hai

wo har rang apna dikhane lage hain

hawa se bujhega na dil ka diya ab

use KHun jigar ka pilane lage hain

hamein koi bhane dubara laga hai

ke hum hijr ko ab Darane lage hain

nahin 'ishq tha phir bhi baraat aai

samajon ko chashme purane lage hain

kabhi bhi na haarenge hum 'ishq wale

hamein jitne mein zamane lage hain