hamein jab se mohabbat ho gai hai

hameñ jab se mohabbat ho ga.ī hai

ajab sī dil kī hālat ho ga.ī hai

kuḌhātā hī rahā mujh ko hamesha

mujhe is dil se vahshat ho ga.ī hai

jahāñ kā paas hai kahtā huuñ apnā

vagarna un se nafrat ho ga.ī hai

unheñ paane kī thī jo ik tamanna

vahī ab dil kī hasrat ho ga.ī hai

tirī sar-mastiyāñ saaqī salāmat

ye duniyā ek hairat ho ga.ī hai

kabhī pur-kaif thī ye zindagānī

magar ab ik musībat ho ga.ī hai

unheñ hasrat se dekhā raat maiñ ne

yahī mujh se sharārat ho ga.ī hai

jise kahtā hai 'ālam' ik fasāna

zamāne kī haqīqat ho ga.ī hai

hamein jab se mohabbat ho gai hai

ajab si dil ki haalat ho gai hai

kuDhata hi raha mujh ko hamesha

mujhe is dil se wahshat ho gai hai

jahan ka pas hai kahta hun apna

wagarna un se nafrat ho gai hai

unhen pane ki thi jo ek tamanna

wahi ab dil ki hasrat ho gai hai

teri sar-mastiyan saqi salamat

ye duniya ek hairat ho gai hai

kabhi pur-kaif thi ye zindagani

magar ab ek musibat ho gai hai

unhen hasrat se dekha raat main ne

yahi mujh se shararat ho gai hai

jise kahta hai 'alam' ek fasana

zamane ki haqiqat ho gai hai