hamein jo shauq tha achchhaiyon ka

hameñ jo shauq thā achchhā.iyoñ kā

vahī baa.is banā rusvā.iyoñ kā

maiñ dil ko dafn kar aaya vahīñ par

jahāñ kal shor thā shahnā.iyoñ kā

faqat is vāste ḳhāmosh the ham

hameñ Dar thā tirī rusvā.iyoñ kā

merī uljhan ke aage sar-nigūñ haiñ

vo jin ko zo'm thā dānā.iyoñ kā

jise dekho vo dhokā de rahā hai

tumhārā shahr hai harjā.iyoñ kā

na chhoḌeñge kabhī tum ko akelā

hameñ ehsās hai tanhā.iyoñ kā

vo ab mahñgā.ī par ḳhāmosh kyoñ haiñ

jinheñ ġham thā bahut mahñgā.iyoñ kā

use hākim banāyā jā rahā hai

jo kal sardār thā balvā.iyoñ kā

hamein jo shauq tha achchhaiyon ka

wahi bais bana ruswaiyon ka

main dil ko dafn kar aaya wahin par

jahan kal shor tha shahnaiyon ka

faqat is waste KHamosh the hum

hamein Dar tha teri ruswaiyon ka

meri uljhan ke aage sar-nigun hain

wo jin ko zo'm tha danaiyon ka

jise dekho wo dhoka de raha hai

tumhaara shahr hai harjaiyon ka

na chhoDenge kabhi tum ko akela

hamein ehsas hai tanhaiyon ka

wo ab mahngai par KHamosh kyon hain

jinhen gham tha bahut mahngaiyon ka

use hakim banaya ja raha hai

jo kal sardar tha balwaiyon ka