hamein KHwab mein hi bulaya to hota

hameñ ḳhvāb meñ hī bulāyā to hotā

chhupā dard dil kā batāyā to hotā

mujhe mushkiloñ meñ ga.e chhoḌ kar tum

mirā saath yaaro nibhāyā to hotā

nahīñ jhuuT kahtā kabhī bhī kisī se

kabhī ḳhud ko darpan dikhāyā to hotā

gayā duur jab se mujhe chhoḌ kar vo

mirī samt ik baar aaya to hotā

havā meñ yahāñ nafrateñ ghul rahī haiñ

mohabbat kā gul bhī lagāyā to hotā

amīrī ġharībī milegī to har-sū

nazar kā ye pardā haTāyā to hotā

rakhī lab pe muskān ham ne bhī yaaro

kabhī dard apnā dikhāyā to hotā

mohabbat ḳhudā hai zabāñ par hai mere

zamāne ko ai kaash bhāyā to hotā

hamein KHwab mein hi bulaya to hota

chhupa dard dil ka bataya to hota

mujhe mushkilon mein gae chhoD kar tum

mera sath yaro nibhaya to hota

nahin jhuT kahta kabhi bhi kisi se

kabhi KHud ko darpan dikhaya to hota

gaya dur jab se mujhe chhoD kar wo

meri samt ek bar aaya to hota

hawa mein yahan nafraten ghul rahi hain

mohabbat ka gul bhi lagaya to hota

amiri gharibi milegi to har-su

nazar ka ye parda haTaya to hota

rakhi lab pe muskan hum ne bhi yaro

kabhi dard apna dikhaya to hota

mohabbat KHuda hai zaban par hai mere

zamane ko ai kash bhaya to hota