hamein kya jo gul khile hain ya kali hai muskurai

hameñ kyā jo gul khile haiñ yā kalī hai muskurā.ī

tū nahīñ hai jān-e-jānāñ to bāhar kyoñ hai aa.ī

tū ho ham-nashīñ sanam jab lage farsh arsh jaisā

vo bahisht bhī hai dozaḳh jahāñ tū na de dikhā.ī

chunī kis binā pe tū ne hamīñ muflisoñ kī bastī

tujhe barq ye siyāsat batā kis ne hai sikhā.ī

thā qusūr mere dil kā yā nasīb kī thī sāzish

mujhe jo bhī chiiz bhaa.ī kabhī raas vo na aa.ī

tujhe kis tarah se jalva dikhe ai 'sadā' ḳhudā kā

ki hai darmiyān haa.il tirā zauq-e-ḳhud-numā.ī

hamein kya jo gul khile hain ya kali hai muskurai

tu nahin hai jaan-e-jaanan to bahar kyon hai aai

tu ho ham-nashin sanam jab lage farsh arsh jaisa

wo bahisht bhi hai dozaKH jahan tu na de dikhai

chuni kis bina pe tu ne hamin muflison ki basti

tujhe barq ye siyasat bata kis ne hai sikhai

tha qusur mere dil ka ya nasib ki thi sazish

mujhe jo bhi chiz bhai kabhi ras wo na aai

tujhe kis tarah se jalwa dikhe ai 'sada' KHuda ka

ki hai darmiyan hail tera zauq-e-KHud-numai