hamein kya KHabar hai kahan chhoD aae

hameñ kyā ḳhabar hai kahāñ chhoḌ aa.e

bahut pīchhe ham kārvāñ chhoḌ aa.e

hameñ tū ne baḳhshe the ġham ke añdhere

añdheroñ meñ ham kahkashāñ chhoḌ aa.e

azal se tabī.at thī āvāra apnī

zamīñ ke liye āsmāñ chhoḌ aa.e

zamāna hameñ bhuul pā.egā kaise

har ik dil meñ dard-e-nihāñ chhoḌ aa.e

bulāyā hai tum ne to izzat bhī rakhnā

pas-e-pusht saarā jahāñ chhoḌ aa.e

'majīd' apne dāman meñ kāñTe sajā kar

tumhāre liye gulsitāñ chhoḌ aa.e

hamein kya KHabar hai kahan chhoD aae

bahut pichhe hum karwan chhoD aae

hamein tu ne baKHshe the gham ke andhere

andheron mein hum kahkashan chhoD aae

azal se tabiat thi aawara apni

zamin ke liye aasman chhoD aae

zamana hamein bhul paega kaise

har ek dil mein dard-e-nihan chhoD aae

bulaya hai tum ne to izzat bhi rakhna

pas-e-pusht sara jahan chhoD aae

'majid' apne daman mein kanTe saja kar

tumhaare liye gulsitan chhoD aae