hamein mausamon ka shuur hai hamein na-samajh na KHayal kar

hameñ mausamoñ kā shu.ūr hai hameñ nā-samajh na ḳhayāl kar

tū naved-e-fasl-e-bahār de na lahū fazā meñ uchhāl kar

kabhī apne tā.ir-e-shauq ko na asīr-e-dām-e-ḳhayāl kar

kabhī guftugū-e-firāq kar kabhī justujū-e-visāl kar

na ḳhirad ko sarf-e-nashāt kar na junūñ ko vaqf-e-malāl kar

koī sehr-kār-e-hunar dikhā koī sa.ī-e-kasb-e-kamāl kar

na hikāyat-e-shab-o-roz kah na shikāyat-e-mah-o-sāl kar

na kisī ko vāqif-e-dard kar na kisī ko shāmil-e-hāl kar

sar-e-bazm ho jo suḳhan-sarā kahe harf harf sañbhāl kar

na kisī ko talḳh javāb de na kisī se tund savāl kar

maiñ unheñ qubūl nahīñ magar mire ham-safīr ye soch leñ

ki phir un ke paas rahegā kyā mujhe gulsitāñ se nikāl kar

vo tirī ġhinā kā mutālba ki farāḳh dast-e-atā rahe

ye tirī anā kā mo.āmla na darāz dast-e-savāl kar

mirā dil nahīñ mirā mas.ala ki hai ab ye aap kā aa.ina

ise ehtiyāt se dekhnā ise toḌnā to sañbhāl kar

maiñ amīr-e-mulk-e-tarab nahīñ mujhe jām-e-jam kī talab nahīñ

mirī asl hai isī ḳhaak se mujhe pesh jām-e-sifāl kar

hamein mausamon ka shuur hai hamein na-samajh na KHayal kar

tu nawed-e-fasl-e-bahaar de na lahu faza mein uchhaal kar

kabhi apne tair-e-shauq ko na asir-e-dam-e-KHayal kar

kabhi guftugu-e-firaq kar kabhi justuju-e-visal kar

na KHirad ko sarf-e-nashat kar na junun ko waqf-e-malal kar

koi sehr-kar-e-hunar dikha koi sai-e-kasb-e-kamal kar

na hikayat-e-shab-o-roz kah na shikayat-e-mah-o-sal kar

na kisi ko waqif-e-dard kar na kisi ko shamil-e-haal kar

sar-e-bazm ho jo suKHan-sara kahe harf harf sanbhaal kar

na kisi ko talKH jawab de na kisi se tund sawal kar

main unhen qubul nahin magar mere ham-safir ye soch len

ki phir un ke pas rahega kya mujhe gulsitan se nikal kar

wo teri ghina ka mutalba ki faraKH dast-e-ata rahe

ye teri ana ka moamla na daraaz dast-e-sawal kar

mera dil nahin mera masala ki hai ab ye aap ka aaina

ise ehtiyat se dekhna ise toDna to sanbhaal kar

main amir-e-mulk-e-tarab nahin mujhe jam-e-jam ki talab nahin

meri asl hai isi KHak se mujhe pesh jam-e-sifal kar