hamein tabir pahle di gai phir KHwab utre

hameñ ta.abīr pahle dī ga.ī phir ḳhvāb utre

kitāb-e-zindagī ke is tarah kuchh baab utre

mirī āñkhoñ se le le raushnī aur nuur kar de

kisī qīmat pe mālik manzar-e-shab-tāb utre

khule bartan uThā kar rakh diye jo bārishoñ meñ

yahāñ vo rah ga.e ḳhālī vahāñ sailāb utre

tahā.if kī jinheñ ummīd thī vo muntazir haiñ

musāfir aa chukā hai ab zarā asbāb utre

bahut aañsū bahā.e chāhatoñ kī ibtidā meñ

baḌī mushkil se ham par ishq ke ādāb utre

samundar ne kahānī muḳhtasar kar ke kahā bas

bahut girdāb utre aur bas girdāb utre

ḳhizāñ se nisbateñ itnī purānī aur phir bhī

unhī logoñ pe lahje is qadar shādāb utre

hamein tabir pahle di gai phir KHwab utre

kitab-e-zindagi ke is tarah kuchh bab utre

meri aankhon se le le raushni aur nur kar de

kisi qimat pe malik manzar-e-shab-tab utre

khule bartan uTha kar rakh diye jo barishon mein

yahan wo rah gae KHali wahan sailab utre

tahaif ki jinhen ummid thi wo muntazir hain

musafir aa chuka hai ab zara asbab utre

bahut aansu bahae chahaton ki ibtida mein

baDi mushkil se hum par ishq ke aadab utre

samundar ne kahani muKHtasar kar ke kaha bas

bahut girdab utre aur bas girdab utre

KHizan se nisbaten itni purani aur phir bhi

unhi logon pe lahje is qadar shadab utre