hamein to jism se bahar khula sa lagta hai

hameñ to jism se bāhar khulā sā lagtā hai

ye jism ruuh pe lipTī ridā sā lagtā hai

har ek chehre pe kuchh rang hai kudūrat kā

tamām shahr kā mausam ḳhafā sā lagtā hai

suḳhan fareboñ ko rakhtā hai vo aziiz magar

mirā ḳhulūs use be-mazā sā lagtā hai

vajūd us kā munavvar hai us kī sīrat se

vo aadmī hai magar aa.ina sā lagtā hai

tumhārī zaat pe kartā hai jab koī tanqīd

ḳhudā hī jaane mujhe kyoñ burā sā lagtā hai

amīr-e-shahr kā kirdār hī nahīñ khultā

kabhī harīf kabhī ham-navā sā lagtā hai

'niyāz' fikr dikhātī hai jab kabhī e.ajāz

purānā lafz bhī bilkul nayā sā lagtā hai

hamein to jism se bahar khula sa lagta hai

ye jism ruh pe lipTi rida sa lagta hai

har ek chehre pe kuchh rang hai kudurat ka

tamam shahr ka mausam KHafa sa lagta hai

suKHan farebon ko rakhta hai wo aziz magar

mera KHulus use be-maza sa lagta hai

wajud us ka munawwar hai us ki sirat se

wo aadmi hai magar aaina sa lagta hai

tumhaari zat pe karta hai jab koi tanqid

KHuda hi jaane mujhe kyon bura sa lagta hai

amir-e-shahr ka kirdar hi nahin khulta

kabhi harif kabhi ham-nawa sa lagta hai

'niyaz' fikr dikhati hai jab kabhi eajaz

purana lafz bhi bilkul naya sa lagta hai