hamein to KHwabon ki wadiyon mein hayat ko hai tamam karna

hameñ to ḳhvāboñ kī vādiyoñ meñ hayāt ko hai tamām karnā

tumhārī yādoñ meñ sub.h karnā tumhārī yādoñ meñ shaam karnā

bhulāne vaale kā yaad aanā sitam nahīñ hai to aur kyā hai

ki ḳhud to ishrat kī niiñd sonā hamārī nīñdeñ harām karnā

banā ke apnā badalne vaale hai yaad ham ko bhī vo zamāna

tapāk se terā ham se milnā vo terā hañs kar kalām karnā

mirā muqaddar hai nā-murādī maiñ ġham kā ḳhūgar maiñ ġham kā aadī

tujhe bhī gar koī ġham mile to use bhī mere hī naam karnā

bichhaḌ ke bhī us se rābta hai ye silsila hai ye mashġhala hai

usī kī yādoñ meñ kho.e rahnā ḳhayāl meñ sub.h-o-shām karnā

mire fasāne kā vo hai unvāñ ye baat ab is pe munhasir hai

mirī mohabbat kā ye fasāna tamām yā nā-tamām karnā

haiñ mai-kade meñ sabhī barābar ye baat achchhī nahīñ hai saaqī

kisī ko jām-e-sharāb denā kisī ko mahrūm-e-jām karnā

mire nasheman kā ye chaman ab na jaane kyoñ tang ho gayā hai

isī chaman ko sikhāyā maiñ ne bahār kā ehtirām karnā

qafas se chhuT kar asiir jis dam chaman meñ aa.e to haal ye thā

kabhī nasheman ke bose lenā kabhī guloñ se kalām karnā

maiñ tark-e-ulfat to tum se kar luuñ magar mirī shart sirf ye hai

kabhī nazar se girā na denā kabhī na ye baat aam karnā

'zafar' tirī dāstān-e-ġham meñ bas ek lafz-e-vafā hai kaafī

ye dāstāñ jab sunā.ī jaa.e to is ko harf-e-tamām karnā

hamein to KHwabon ki wadiyon mein hayat ko hai tamam karna

tumhaari yaadon mein subh karna tumhaari yaadon mein sham karna

bhulane wale ka yaad aana sitam nahin hai to aur kya hai

ki KHud to ishrat ki nind sona hamari ninden haram karna

bana ke apna badalne wale hai yaad hum ko bhi wo zamana

tapak se tera hum se milna wo tera hans kar kalam karna

mera muqaddar hai na-muradi main gham ka KHugar main gham ka aadi

tujhe bhi gar koi gham mile to use bhi mere hi nam karna

bichhaD ke bhi us se rabta hai ye silsila hai ye mashghala hai

usi ki yaadon mein khoe rahna KHayal mein subh-o-sham karna

mere fasane ka wo hai unwan ye baat ab is pe munhasir hai

meri mohabbat ka ye fasana tamam ya na-tamam karna

hain mai-kade mein sabhi barabar ye baat achchhi nahin hai saqi

kisi ko jam-e-sharab dena kisi ko mahrum-e-jam karna

mere nasheman ka ye chaman ab na jaane kyon tang ho gaya hai

isi chaman ko sikhaya main ne bahaar ka ehtiram karna

qafas se chhuT kar asir jis dam chaman mein aae to haal ye tha

kabhi nasheman ke bose lena kabhi gulon se kalam karna

main tark-e-ulfat to tum se kar lun magar meri shart sirf ye hai

kabhi nazar se gira na dena kabhi na ye baat aam karna

'zafar' teri dastan-e-gham mein bas ek lafz-e-wafa hai kafi

ye dastan jab sunai jae to is ko harf-e-tamam karna