hamein usne sabhi ahwal se anjaan rakkha

hameñ us ne sabhī ahvāl se anjān rakkhā

hamāre aur apne biich parda taan rakkhā

kabhī hadd-e-nazar meñ aur kabhī imkāñ se bāhar

hameñ to us ne saarī zindagī hairān rakkhā

mirī parvāz kī had jāntā thā is liye bhī

mire uupar ye niilā āsmāñ nigrān rakkhā

zarā ruknā ki maiñ is bojh se āzād ho luuñ

ki tāq-e-dil meñ hai duniyā kā kuchh sāmān rakkhā

mohabbat kī qasam vo mujh se lenā chāhtā thā

so in hāthoñ pe lā ke 'mīr' kā dīvān rakkhā

hamein us ne sabhi ahwal se anjaan rakkha

hamare aur apne bich parda tan rakkha

kabhi hadd-e-nazar mein aur kabhi imkan se bahar

hamein to us ne sari zindagi hairan rakkha

meri parwaz ki had jaanta tha is liye bhi

mere upar ye nila aasman nigran rakkha

zara rukna ki main is bojh se aazad ho lun

ki taq-e-dil mein hai duniya ka kuchh saman rakkha

mohabbat ki qasam wo mujh se lena chahta tha

so in hathon pe la ke 'mir' ka diwan rakkha