hamein yunhi na sar-e-ab-o-gil banaya jae

hameñ yūñhī na sar-e-āb-o-gil banāyā jaa.e

hamāre ḳhvāb diye jaa.eñ dil banāyā jaa.e

dikhā.ī detā hai tasvīr-e-jāñ meñ donoñ taraf

hamārā zaḳhm zarā mundamil banāyā jaa.e

agar jalāyā gayā hai kahīñ diye se diyā

to kyā ajab ki kabhī dil se dil banāyā jaa.e

shadīd-tar hai tasalsul meñ hijr kā mausam

kabhī milo ki use mo'tadil banāyā jaa.e

ye naqsh ban nahīñ saktā to kyā zarūrī hai

ḳharāb-o-ḳhasta o ḳhvār-o-ḳhajil banāyā jaa.e

hamein yunhi na sar-e-ab-o-gil banaya jae

hamare KHwab diye jaen dil banaya jae

dikhai deta hai taswir-e-jaan mein donon taraf

hamara zaKHm zara mundamil banaya jae

agar jalaya gaya hai kahin diye se diya

to kya ajab ki kabhi dil se dil banaya jae

shadid-tar hai tasalsul mein hijr ka mausam

kabhi milo ki use mo'tadil banaya jae

ye naqsh ban nahin sakta to kya zaruri hai

KHarab-o-KHasta o KHwar-o-KHajil banaya jae