hamein zahid jo kafir jaanta hai

hameñ zāhid jo kāfir jāntā hai

to phir patthar ko tū kyuuñ māntā hai

na pūchhā us ne mujh ko kaun hai tū

huā sābit ki vo pahchāntā hai

na mujh se pher muñh kāfir ḳhudārā

are qur.ān kyuuñ gardāntā hai

kahūñ kis se ki kyā hai yaar merā

use kuchh merā jī hī jāntā hai

bahut chāhā na bolūñ yaar tujh se

magar zālim ye dil kab māntā hai

nahīñ chhalnī hamārā dil na hogā

hamārī baat kyuuñ tū chhāntā hai

na deñge jaan ham kahne pe us ke

raqīb-e-rū-siyah kyuuñ tāntā hai

bhalā kyūñ-kar use samjhā.e koī

vo kāfir kab kisī kī māntā hai

ġhazab hai chheḌnā us fitna-gar ko

ye 'anjum' dil meñ kyā tū Thāntā hai

hamein zahid jo kafir jaanta hai

to phir patthar ko tu kyun manta hai

na puchha us ne mujh ko kaun hai tu

hua sabit ki wo pahchanta hai

na mujh se pher munh kafir KHudara

are quran kyun gardanta hai

kahun kis se ki kya hai yar mera

use kuchh mera ji hi jaanta hai

bahut chaha na bolun yar tujh se

magar zalim ye dil kab manta hai

nahin chhalni hamara dil na hoga

hamari baat kyun tu chhanta hai

na denge jaan hum kahne pe us ke

raqib-e-ru-siyah kyun tanta hai

bhala kyun-kar use samjhae koi

wo kafir kab kisi ki manta hai

ghazab hai chheDna us fitna-gar ko

ye 'anjum' dil mein kya tu Thanta hai