hamesha bait-e-wafa ka tawaf maine kiya

hamesha bait-e-vafā kā tavāf maiñ ne kiyā

ḳhatā udhar se huī e'tirāf maiñ ne kiyā

mirā zamīr hai munsif mujhe sazā degā

sadāqatoñ se agar inhirāf maiñ ne kiyā

dikhā ke logoñ ko ā.īna kyā milā mujh ko

tamām shahr ko apne ḳhilāf maiñ ne kiyā

sazā na de ke sabaq de diyā sitamgar ko

ḳhushī kī baat hai us ko mu'āf maiñ ne kiyā

mirā mizāj nahīñ haañ meñ haañ milāne kā

ġhalat thī baat tirī iḳhtilāf maiñ ne kiyā

mirī ḳhushī kā vo qātil thā bāvajūd is ke

'shafīq' us ko bhī dil se mu'āf maiñ ne kiyā

hamesha bait-e-wafa ka tawaf main ne kiya

KHata udhar se hui e'tiraf main ne kiya

mera zamir hai munsif mujhe saza dega

sadaqaton se agar inhiraf main ne kiya

dikha ke logon ko aaina kya mila mujh ko

tamam shahr ko apne KHilaf main ne kiya

saza na de ke sabaq de diya sitamgar ko

KHushi ki baat hai us ko mu'af main ne kiya

mera mizaj nahin han mein han milane ka

ghalat thi baat teri iKHtilaf main ne kiya

meri KHushi ka wo qatil tha bawajud is ke

'shafiq' us ko bhi dil se mu'af main ne kiya