hamesha hi se rahti hai ye duniya bad-guman humse

hamesha hī se rahtī hai ye duniyā bad-gumāñ ham se

mohabbat kī zamāne meñ hai jabki dāstāñ ham se

hamesha rūThā rūThā lagtā hai ye āsmāñ ham se

tabhī to le rahā har din ye 'ātif' imtihāñ ham se

koī bhī hukm kartā hai vo nāfiz baa'd meñ yaaro

ijāzat letā hai pahle amīr-e-kārvāñ ham se

use lagtā hai shāyad is chaman ke gul nahīñ haiñ ham

ḳhafā rahtā hai shāyad is liye hī bāġhbāñ ham se

mahak miTTī kī merī ruuh par ābād hai jis kī

vahī chhīnā gayā hai kyoñ ai yaaro gulsitāñ ham se

jinheñ kal bolnā ham ne sikhāyā thā zamāne meñ

laḌāte haiñ vahī ab dosto dekho zabāñ ham se

vo sūraj se bachātā kyā usī ko sauñp kar ham ko

chalā aayā hai dāman ko chhuḌā kar sā.ebāñ ham se

hamesha hi se rahti hai ye duniya bad-guman hum se

mohabbat ki zamane mein hai jabki dastan hum se

hamesha ruTha ruTha lagta hai ye aasman hum se

tabhi to le raha har din ye 'atif' imtihan hum se

koi bhi hukm karta hai wo nafiz ba'd mein yaro

ijazat leta hai pahle amir-e-karwan hum se

use lagta hai shayad is chaman ke gul nahin hain hum

KHafa rahta hai shayad is liye hi baghban hum se

mahak miTTi ki meri ruh par aabaad hai jis ki

wahi chhina gaya hai kyon ai yaro gulsitan hum se

jinhen kal bolna hum ne sikhaya tha zamane mein

laDate hain wahi ab dosto dekho zaban hum se

wo suraj se bachata kya usi ko saunp kar hum ko

chala aaya hai daman ko chhuDa kar saeban hum se