hamin jaise bina patwar dariya par karte hain

hamīñ jaise binā patvār dariyā paar karte haiñ

vo kyā maujoñ se Takrā.eñge jo paanī se Darte haiñ

unhīñ ko ai vatan kyoñ hāshiye pe rakkhā jaatā hai

tirī sūrat meñ jo ḳhūn-e-jigar se rang bharte haiñ

agar zinda hī rahnā hai to rahiye apnī shartoñ par

ki ḳhuddārī se ḳhālī log sau sau baar marte haiñ

ġhanīmat hai bachā rakkhā hai ham ne rang-o-ḳhushbū ko

ki ham vo phuul haiñ jo roz sho'loñ se guzarte haiñ

'bashar' sach bolne vāloñ ko koī kyā Darā.egā

jo Darte haiñ ḳhudā se vo kahāñ duniyā se Darte haiñ

hamin jaise bina patwar dariya par karte hain

wo kya maujon se Takraenge jo pani se Darte hain

unhin ko ai watan kyon hashiye pe rakkha jata hai

teri surat mein jo KHun-e-jigar se rang bharte hain

agar zinda hi rahna hai to rahiye apni sharton par

ki KHuddari se KHali log sau sau bar marte hain

ghanimat hai bacha rakkha hai hum ne rang-o-KHushbu ko

ki hum wo phul hain jo roz sho'lon se guzarte hain

'bashar' sach bolne walon ko koi kya Daraega

jo Darte hain KHuda se wo kahan duniya se Darte hain